Gəncə Gömrük İdarəsinin əməkdaşlarından ibarət əməliyyat qrupunun üzvləri əməliyyat-axtarış tədbirləri keçiriblər. Bu haqda 13 may tarixində Report-a istinadən xəbər veririk.
Adıçəkilən qurumun nümayəndələri külli miqdarda aksiz markası olmayan siqaretlər aşkar ediblər. Azərbaycanın aksiz markası ilə markalanmalı olan, lakin belə marka ilə markalanmamış külli miqdarda tütün məmulatlarının qanunsuz idxalı, satış məqsədilə saxlanılması və satışının həyata keçirilməsinə dair məlumat daxil olub. Əməliyyat məlumatı əsasında müvafiq məhkəmə qərarı ilə Tovuz rayon sakininə məxsus fərdi yaşayış evinə baxış keçirilib.
Fərdi yaşayış evindən 122 karton qutuda qablaşdırılmış 1 milyon 219 min 980 ədəd müxtəlif növ aksiz markası ilə markalanmamış tütün məmulatları tapılaraq götürülüb. Komitənin Əməliyyat-İstintaq Baş İdarəsi tərəfindən hüquqpozmaya yol vermiş şəxslərin məsuliyyətə cəlb edilməsi üçün fakt üzrə araşdırma aparılır.
DGK bir daha vətəndaşların diqqətinə çatdırır ki, iri vergi tutumlu və aksiz markası ilə markalanmalı olan siqaretlərin qanunsuz idxalı, satışı, əldə edilməsi, daşınması, saxlanması, onlardan istifadə edilməsi və onlar üzərində sərəncam verilməsi, habelə bu qəbildən olan digər hərəkətlər dövlətin, bu sahədə qanuni sahibkarlıq fəaliyyəti ilə məşğul olan şəxslərin, habelə istehlakçıların mənafeyinə ziyan vurur, törədilmiş hüquqpozmanın xarakterindən asılı olaraq, inzibati və cinayət məsuliyyətinə səbəb olur.
