Gəncədə qiymət artımından sonra internetin sürəti ilə bağlı narazılıq çoxalıb.
Gencexeber.az məlumat verir ki, şəhər sakinləri internetin qiymət artımı ilə verilən sürətin arasında tarazlığın olmamasından şikayətlənirlər.
Qiymət dəyişikliyindən sonra sürətin hələ də eyni səviyyədə qalması abonentlər arasında narazılığa səbəb olub. Bildiriblər ki, onlara vəd olunan internetin minimum sürəti təmin olunmur.
Sosial şəbəkə hesablarımızda keçirdiyimiz sorğulara əsasən, izləyicilər daha çox “Ailə NET”, “Katv1” və “BirLink” kimi tanınmış provayderlərinin işindən narazılıqlarını bildiriblər. Üzeyir Hacıbəyov küçəsində yaşayan sakinin sözlərinə görə, onların yaşadığı ərazidə internetin sürəti aşağıdır:
“Bizə interneti "Ailə Net" şirkəti verir. Əvvəl hər ay 18 manat verirdik, indi isə qiyməti qaldırıblar. Lakin, şəbəkə zəifdir. Bizim yaşadığımız ərazidəki evlərin bir çoxları "Ailə Net"-ə qoşuludur”.
"Ailə Net" provayderinin Gülüstan qəsəbəsindən olan müştərisinin sözlərinə görə, sürət heç 30 Mbit/s-yə belə çatmır.
Digər istifadəçilər isə bildiriblər ki, provayderdən asılı olmayaraq ümumiyyətlə Gəncədə internetin sürəti ürəkaçan deyil.
Qeyd edək ki, avqustun 15-dən internetin minimum sürəti 40 Mbit/s-dən 100 Mbit/s-ə çatdırılıb. Eyni zamanda, hər Mbit/s üçün qiymət 0,45 manatdan 0,25 manata endirilib.
Beləliklə, sürət vahidinin dəyərinin azalmasına baxmayaraq, abunəçilər üçün ümumi ödəniş məbləği artıb. Onlar minimum sürətin artırılması ilə bağlı əvvəlki 18 manat əvəzinə indi 25 manat ödəməli olacaqlar.
