Gəncədə fəaliyyət göstərən marketdə saxta alkoqollu içkilər aşkarlanıb. Bu haqda 5 iyun tarixində AQTA-ya istinadən xəbər veririk.
Azərbaycan Respublikası Qida Təhlükəsizliyi Agentliyinin əməkdaşları tərəfindən Gəncə şəhərinin 2-ci mikrorayon ərazisində fəaliyyət göstərən “Ailə” marketində yoxlama həyata keçirilib. Nəticədə marketdə aşkar saxtalaşdırma əlamətləri olan, keyfiyyət və təhlükəsizliyini təsdiq edən sənədlərlə müşayiət edilməyən “Banketnaya Yubiley 10” əmtəə nişanlı alkoqollu içkilər aşkarlanıb.
Qeyd olunan alkoqollu içkinin kəskin fərqləndiyi, başlıq hissələrinin butulkalara təkrar bərkidildiyi, məhsulların üzərində istehsal tarixlərinin qeyd edilmədiyi müşahidə olunub. Məhsullardan nümunələr götürülərək Azərbaycan Qida Təhlükəsizliyi İnstitutunun müvafiq laboratoriyasına göndərilib. Müayinələr nəticəsində nümunələrdə bir sıra uyğunsuzluqlar aşkarlanıb.
Faktla bağlı məsələyə hüquqi qiymət verilməsi məqsədilə iş üzrə toplanmış materiallar aidiyyəti üzrə göndərilib. Məhsullar saxlanca qoyulub.
Araşdırmalar davam etdirilir.
