Goranboy rayonunda 5 nəfərin xəsarət alması ilə nəticələnən yol-nəqliyyat hadisəsi baş verib.
Gencexeber.az-ın məlumatına görə, qəza Bakı-Ələt-Qazax-Gürcüstan dövlət sərhədi avtomobil yolunun Goranboy rayonundan keçən hissəsində qeydə alınıb.
Belə ki, hərəkətdə olan VAZ markalı minik avtomobili idarəetmədən çıxaraq yük maşınına çırpılıb. Nəticədə bir ailənin 5 üzvü – 3 kişi və 2 qadın xəsarət alıb.
Xəsarət alan şəxslər Goranboy Rayon Mərkəzi Xəstəxanasına çatdırılıblar. Onlara bədənin müxtəlif nahiyələrinin çoxsaylı travmaları diaqnozu qoyulub. Xəstəxanadan verilən məlumata görə, yaralılardan ikisinin vəziyyəti orta ağır, üçünün vəziyyəti isə stabil qiymətləndirilir.
Hadisə yerinə polis əməkdaşları cəlb olunub. Faktla bağlı araşdırma aparılır.
