Gəncədə beynəlxalq konfrans keçirilib. Bu haqda 22 sentyabr tarixində ADAU-ya istinadən məlumat veririk.
“VI Beynəlxalq Ərzaq, Kənd Təsərrüfatı və Baytarlıq Elmləri" beynəlxalq konfransı Azərbaycan Dövlət Aqrar Universitetində Türkiyənin İqtisadi İnkişaf və Sosial Araşdırmalar İnstitutu (İKSAD) və EGE Universiteti ilə birlikdə hibrid formatda təşkil olunub. Burada ADAU-nun tanıtım çarxı iştirakçılara nümayiş etdirilib. Rektor Zəfər Qurbanov bildirib ki, konfransın əsas məqsədi dünyada kənd təsərrüfatının ayrı-ayrı sahələri üzrə elmi nailiyyətlər əldə etmiş alimlərin birgə əməkdaşlıq etməsidir.
Kənd təsərrüfatı nazirinin müavini Elçin Zeynalov mövzunun aktuallığından danışıb. O, ölkə əhalisinin keyfiyyətli kənd təsərrüfatı məhsulları ilə təmin olunmasında yüksək ixtisaslı mütəxəssislərin yetişdirilməsinin əhəmiyyətini diqqətə çatdırıb.
Ege Universitetinin rektoru Necdet Budak, Türkiyənin İqtisadi İnkişaf və Sosial Araşdırmalar İnstitutunun rəhbəri Mustafa Latif Emek və Türkiyənin Gəncə şəhərindəki Baş Konsulu Recep Öztop Türkiyə və Azərbaycan arasında olan möhkəm qardaşlıq əlaqələrindən söz açıblar.
YAP Gəncə şəhər təşkilatının sədri Bayram Aslanov, Gəncə-Daşkəsən Regional Təhsil İdarəsinin müdiri Anar Qədiməliyev, İKSAD təşkilatının Azerbaycan üzrə rəhbəri Elvan Cəfərov da çıxış edərək fikirlərini səsləndiriblər.
