Tovuz rayonunda 64 yaşlı kişi sevgi münasibətində olduğu qadının yetkinlik yaşına çatmayan qızına təcavüz etməkdə ittiham olunub.
1962-ci il təvəllüdlü Aydın tanışı Günellə (adlar şərti verilib – red.) cinsi əlaqəyə girib, ona qarşı seksual xarakterli digər hərəkətlər edib.
Yaşlı kişi "VAZ-2106" markalı avtomobilində Güneli razılığı əsasında Tovuz rayonu, Qovlar şəhərində yerləşən "Gillik" adlanan çöl ərazisinə aparıb, avtomobilin salon hissəsində onunla intim əlaqədə olub.
Aydın elan olunmuş ittiham üzrə özünü təqsirli bilməyib, ifadəsində göstərib ki, Günelin çağırışı ilə onunla görüşüb:
"Günelin anası ilə münasibətim vardı, bəzən məni evlərinə çağırırdı. Mən onun evinə gedəndə bazarlıq da edirdim. Günelin 8-ci sinifdə oxuduğunu və təxmini yaşını bilirdim. Mənə özü görüşməyi təklif etdi. Onunla cinsi əlaqədə olmamışam, seksual xarakterli hərəkətlər etmişəm".
İş üzrə zərərçəkmiş Günelin sözlərinə görə, Aydın onunla 3 dəfə ayrı-ayrı vaxtlarda cinsi əlaqədə olub.
Gəncə Ağır Cinayətlər Məhkəməsinin hökmü ilə Aydın 6 il müddətinə azadlıqdan məhrum edilib, həmçinin 2 il müddətə övladını tərbiyə etmək hüququndan məhrum olunub. Hökmdən narazı qalan Aydın apellyasiya şikayəti verib.
Gəncə Apellyasiya Məhkəməsi təqsirləndirilən şəxsin şikayəti təmin etməyib. Amma Gəncə Ağır Cinayətlər Məhkəməsinin Aydına təyin edilmiş 2 il müddətə övladını tərbiyə etmək hüququndan məhrumetmə cəzası dəyişdirilib. Ona 2 il müddətə uşaqların tərbiyəsi ilə bağlı vəzifə tutma və ya uşaqların tərbiyəsi ilə bağlı fəaliyyətlə məşğul olma hüququndan məhrum etmə cəzası da təyin olunub.
Mənbə: teleqraf.аz
