“Kəpəz” – “Turan Tovuz” rəqabəti Azərbaycan futbolunun tarixi salnaməsinin ən parlaq səhifələrindən birinə çevrilib. Bununla bağlı Gəncəxəbər.az redaksiyası olaraq 17 avqust tarixində oxucularımız üçün qısa icmal hazırlamışıq.
1959-cu ildə əsası qoyulan “Kəpəz” ölkə futbolunun flaqmanlarından biridir. 1992-ci ildə təsis olunan “Turan Tovuz” isə klubumuzun uzun müddətdir ki, əzəli rəqibidir.
32 il ərzində komandalar 50-dən çox oyun keçiriblər ki, onların hər biri gərginlik və dramatikliyinə görə yaddaşlarda qalıb.
Bugünkü qarşılaşma təkcə keçmişdəki parlaq qələbə və acı məğlubiyyətlərə görə deyil, həm də azarkeşlərin öz komandalarına ehtiraslı dəstəyinə görə xüsusi diqqət çəkir. Yaddaqalan oyunlar arasında “Kəpəz”in xeyrinə bitən 2000-ci ildə 9:0 və 2013-cü ildə 3:5 hesablı görüşlər də var. Əfsuslar olsun ki, doğma klubumuzun əzəli rəqibinə iri hesabla uduzduğu matçlar da olub. Bunlara 2012-ci ildə 5:1 və ötən li 4:0 hesablı acı məğlubiyyətləri aid etmək olar.
Xatırladaq ki, bu axşam Gəncədə “Kəpəz” PFK – “Turan Tovuz” qərb derbisi baş tutacaq. Qarşılaşma saat 18:15-də başlayacaq. Matç hər iki komandanın azarkeşləri üçün əsl hadisə olacağını vəd edir. Görüş əzəli rəqib qarşısında gücünü nümayiş etdirmək və performansı artırmaq üçün əla fürsət olacaq.
