Gəncəli məktəblilər olimpiadalarda uğurla iştirak ediblər. Bu haqda 14 may tarixində Regional Təhsil İdarəsinə istinadən məlumat veririk.
Məktəblilərarası fənn müsabiqələrinin və Lütfi Zadə adına məntiq-riyaziyyat olimpiadasının finalına vəsiqə qazanan şagirdlərin sayı açıqlanıb. Siyahıya əsasən, Nizami yurdundan müvafiq olaraq, 10 və 12 məktəbli sözügedən olimpiadaların son mərhələsində mübarizə aparacaq.
Ümumilikdə Gəncə-Daşkəsən regionu üzrə bu rəqəmlər 19 və 13 nəfər təşkil edib.
Qeyd edək ki, fənn müsabiqələrində VI sinif şagirdləri riyaziyyat, informatika və təbiət, VII sinif şagirdləri isə riyaziyyat, fizika, kimya və biologiya fənləri üzrə iştirak ediblər. Lütfi Zadə adına riyaziyyat-məntiq olimpiadası isə V sinif şagirdləri arasında təşkil olunub.
