Vətəndaşlar Göygöl rayonunun Çaykənd kəndi istiqamətində, Yeni Zod–Çaykənd–Qarabulaq–Quşçu–Sarısu avtomobil yolunun üzərində yerləşən körpünün qəzalı vəziyyəti ilə bağlı şikayət edirlər.
Gencexeber.az xəbər verir ki, Azərbaycan Avtomobil Yolları Dövlət Agentliyinin (AAYDA) "24 №-li Yol İstismarı" MMC-nin balansında olan körpü son günlər Qərb bölgəsində yağan leysan xarakterli yağışlardan sonra zədələnib.
Sözügedən keçid Göygöl rayonunun Qarabulaq, Quşçu və Sarısu kəndlərinin, eləcə də Goranboy rayonunun Todan, Erkəc, Mənəç və Buzluq kəndlərinin əsas nəqliyyat bağlantısını təmin edir. Təxminən 5 min nəfərin gündəlik istifadə etdiyi körpünün hazırkı vəziyyəti sakinlərdə ciddi narahatlıq yaradır.
Məlumata görə, körpü 1960-cı illərdə inşa olunub. Uzun illər istismarda olması və son yağışların yaratdığı fəsadlar nəticəsində konstruksiyada təhlükəli vəziyyət yaranıb. Bu isə həm avtomobillərin hərəkəti, həm də piyadaların təhlükəsizliyi baxımından ciddi risk hesab olunur.
Sakinlər aidiyyəti qurumlardan körpünün texniki vəziyyətinin təcili qiymətləndirilməsini və bərpa işlərinin qısa müddətdə həyata keçirilməsini xahiş edirlər.
