Göygöldə borc üstündə dava olub.
Demokrat.аz xəbər verir ki, hadisə rayonun Toğanalı kəndində yerləşən "Gözəl məkan" restoranının yaxınlığında baş verib.
Belə ki, sözügedən ərazidə 1996-cı il təvəllüdlü Emin tanışı Azərlə rastlaşıb. Azər Emindən 15 manat borc pulunu istədiyi üçün aralarında mübahisə baş verib.
Emin kəsici-deşici alətlə Azərin sinəsinə, sağ qol və qasıq nahiyəsinə zərbələr vuraraq xəsarətlər yetirib.
Emin ona cinayət işi üzrə elan olunmuş ittihamla özünü təqsirli bilib və ifadəsində bunları göstərib:
"Azərə 15 manat borcum var idi. Restoranda mənim əvəzimə hesabı ödəmişdi. Azər pulu istəyəndə aramızda mübahisə yarandı, mənə söyüş söydü. Üzərimdə olan balaca bıçaqla onun qoluna vuraraq xəsarət yetirdim".
Göygöl Rayon Məhkəməsinin hökmü ilə Emin Cinayət Məcəlləsinin 221.3-cü maddəsində nəzərdə tutulmuş cinayət əməlini törətməkdə təqsirli bilinib, 2 il 3 ay müddətinə azadlıqdan məhrum edilib.
