Bu gün şəhid Elvin Mustafayevin doğum günüdür.
Gencexeber.az məlumat verir ki, 7 avqust 1997-ci ildə Gəncə şəhərində anadan olan Elvin Fuad oğlu Mustafayev 2014-cü ildə Gəncə şəhər 6 nömrəli tam orta məktəbi bitirib.
2015-ci ildə Səfərbərlik və Hərbi Xidmətə Çağırış üzrə Dövlət Xidmətinin Gəncə şəhər Nizami Rayon Şöbəsi tərəfindən həqiqi hərbi xidmətə çağırılıb və Müdafiə Nazirliyinin "N" saylı hərbi hissəsində xidmət keçib.
Hərbi xidmətini başa vurduqdan sonra, 2017-ci ildən etibarən Rusiya Federasiyasında ticarət sahəsində fəaliyyət göstərib.
2020-ci il sentyabrın 27-də Vətən müharibəsinin başlaması və ölkədə qismən səfərbərliyin elan olunması ilə əlaqədar yenidən hərbi xidmətə çağırılan Elvin Mustafayev Səfərbərlik və Hərbi Xidmətə Çağırış üzrə Dövlət Xidmətinin Gəncə şəhər Kəpəz Rayon Şöbəsi tərəfindən ordu sıralarına cəlb edilib.
O, Füzuli, Cəbrayıl və Xocavənd istiqamətlərində gedən döyüşlərdə böyük şücaətlə iştirak edib.
Elvin Mustafayev 30 oktyabr 2020-ci ildə döyüş tapşırığını yerinə yetirərkən şəhidlik zirvəsinə ucalıb. Şəhidin nəşi 28 mart 2021-ci il tarixində Gəncə şəhərinin Şəhidlər xiyabanında torpağa tapşırılıb.
Azərbaycan Respublikasının Prezidenti İlham Əliyevin sərəncamları ilə Elvin Mustafayev ölümündən sonra "Vətən uğrunda", "İgidliyə görə", "Füzulinin azad olunmasına görə", "Kəlbəcərin azad olunmasına görə" medalları, həmçinin 3-cü dərəcəli "Vətənə xidmətə görə" ordeni ilə təltif edilib.
Şəhid Elvin Mustafayev subay idi.
