Tovuz rayonunun Yuxarı Öysüzlü kəndində 2011-ci il təvəllüdlü qızın toy mərasiminin keçirilməsi ilə bağlı anası açıqlama verib.
Gencexeber.az-a açıqlama verən Elnarə Ələsgərova bildirib ki, qızı altıncı sinifdən məktəbdən çıxıb:
"Maddi sıxıntılar səbəbindən məktəbdən çıxarmışam. Həmin gün toy yox, "Hə" mərasimi keçirilib. Kafelərdən birində kiçik bir şənlik məclisi qurulub".
Məlumat üçün qeyd edək ki, E.Ələsgərova ikinci dəfə ailə həyatı qurub.
Məhkəmənin qərarı 1 ay müddətinə inzibati qaydada həbs edilən şəxs isə 1992-ci il təvəllüdlü bəyin - Firdovsi Abbasovun atası Fizuli Abbasovdur.
09:34
Tovuz rayonunda 14 yaşlı qızın ərə verilməsi ilə bağlı bəzi detallar məlum olub.
Oxu.аz xəbər verir ki, 2011-ci il təvəllüdlü qızın ailə quracağı şəxs ondan 19 yaş böyük olub.
14 yaşlı qız valideynləri tərəfindən 1992-ci il təvəllüdlü oğlana ərə getməyə məcbur edilib.
08:31
Tovuz Rayon Polis Şöbəsinə rayonun Yuxarı Öysüzlü kəndində 2011-ci il təvəllüdlü qızın toy mərasiminin keçirilməsi barədə məlumat daxil olub.
Gencexeber.az-a Daxili İşlər Nazirliyinin Gəncə regional qrupundan verilən məlumata görə, polis əməkdaşları tərəfindən həmin mərasimin qarşısı alınıb və tərəflərin valideynləri ərazi üzrə polis orqanına dəvət olunublar.
Onlarla profilaktik söhbətlər aparılıb, qanunvericiliyin tələbləri izah edilib və barələrində inzibati protokol tərtib edilərək məhkəməyə göndərilib.
Məhkəmənin qərarı ilə valideynlərdən biri 1 ay müddətinə inzibati qaydada həbs edilib.
