Gəncə Şəhər Məhkəməsi "Fazil-20" MMC-nin direktoru Vaqif Abbasov (ad şərtidir) barəsində əmək qanunvericiliyinin pozulması və vəzifə səlahiyyətlərindən sui-istifadə ilə bağlı cinayət işi üzrə hökm çıxarıb.
Məhkəmə araşdırmaları zamanı müəyyən edilib ki, Vaqif rəhbərlik etdiyi "Fazil-20" MMC-də sərnişindaşıma fəaliyyətinə cəlb olunan sürücülərlə qanunvericiliyin tələb etdiyi əmək müqavilələrini bağlamayıb. Bunun əvəzinə həmin şəxslərlə "avtobusla sərnişin daşımasının yerinə yetirilməsi üçün" mülki-hüquqi müqavilələr bağlanıb.
İttihama görə, 2020–2025-ci illər ərzində Gəncə–Göygöl, Gəncə–Şəmkir, Gəncə–Qızılca və Gəncə–Goranboy marşrutlarında çalışan 11 sürücü əmək münasibətləri rəsmiləşdirilmədən işə cəlb olunub. Nəticədə ümumilikdə 7 020 manat məbləğində ödənişin büdcəyə köçürülmədiyi müəyyən edilib.
Vaqif Abbasov məhkəmədə özünü təqsirli bilməyib. Məhkəmə toplanmış sübutları qiymətləndirərək onu Cinayət Məcəlləsinin iki maddəsi ilə təqsirli bilib.
Hökmə əsasən, V.Abbasova qəti olaraq aylıq qazancının 15 faizi dövlət nəfinə tutulmaqla 1 il 3 ay müddətinə islah işləri cəzası verilib.
Mənbə: qaynarifno.аz
