Gəncədə yol infrastrukturunun vəziyyətinin pisləşməsi sakinlər və avtomobil sürücüləri üçün narahatlıq yaradır.
Gencexeber.az-a şəhər sakinlərindən sözügedən məsələ ilə bağlı bir neçə məlumat daxil olub. Problemlərdən biri 28 May və Nizami Gəncəvi prospektlərinin kəsişməsində müşahidə edilir. Belə ki, avtomobil yolunun üzərində dərin çuxur əmələ gəlib və bu, artıq nəqliyyatın hərəkəti üçün təhlükə mənbəyinə çevrilib.
Bundan başqa, 13 saylı tam orta məktəbə aparan bir neçə köməkçi yollar avtomobillərin hərəkəti üçün bir növ maneə rolu oynayır. Xüsusilə pis hava şəraitində piyadaların hərəkətinə əngəl yaradır, hətta təhlükəli vəziyyətə gətirir.
Gəncədə yolların vəziyyəti ilə bağlı problem digər ərazilərindən də, məsələn, Sevinc qəsəbəsinin 10-cu küçəsindən də yan keçməyib. Daha öncə redaksiyamız bu küçənin acınacaqlı vəziyyəti barədə məlumat versə də, onun təmiri üçün aidiyyəti qurumlar tərəfindən heç bir tədbir görülməyib.
Yerli sakinlər ümid edirlər ki, bu problemlər tezliklə həllini tapacaq.
