Əkbər Ağarza oğlu Babayev 10 iyul 1924-cü ildə Gəncədə anadan olub.
O, orta məktəbi bitirdikdən sonra, 1939-cu ildə indiki Bakı Dövlət Universitetinin Filologiya fakültəsinə daxil olur. İkinci Dünya müharibəsi başladığından Babayev hərbi-tərcüməçilik ixtisasına dəyişilir. Buranı bitirib, Əkbər Babayev cəbhəyə yollanır. 1942-ci ildə o, Xarkov ətrafında gedən döyüşlərdə ağır yaralanır və ordudan tərxis olunur. Sağaldıqdan sonra isə Bakıya qayıdıb, təhsilini davam etdirir. Əkbər Babayev təhsil aldığı müddətdə Azərbaycan Radio Verilişləri Komitəsində çalışır.
Babayev 1946-cı ildə Moskvaya gedir, SSRİ Elmlər Akademiyası Şərqşünaslıq İnstitutunun “Türk şöbəsi” nəzdində aspiranturaya daxil olur. Həmçinin Moskva Radio Verilişləri Komitəsində çalışır. Babayev ömrünün sonunadək Şərqşünaslıq İnstitutunun əməkdaşı olur.
Əkbərin atası, müəllim Ağarza 1947-ci ildə “pantürkist” adı ilə həbs edilir. Atasının həbs olunması Əkbər Babayevin təhsilinə maneələr yaratsa da, o, təhsilini başa vurur.
1951-ci ildə türk yazıçısı Nazim Hikmət Moskvaya səfər edir. Həmin vaxt Əkbər Babayev Nazim Hikmətin yaradıcılığı mövzusunda dissertasiya üzərində işləyirdi. Babayevə dissertasiyanı müdafiə etməsi üçün Nazim Hikmətlə əlaqə yaratmağa icazə verilir.
Əkbər Babayev bir çox elmi əsərlərini Türkiyə ədəbiyyatı və mədəniyyətinə həsr edib. O, Nazim Hikmətin 8 cildlik əsərləri toplusunun nəşrinə rəhbərlik edib. Alim, hətta Nazim Hikmətlə Gəncəyə səfər edib. Əkbər Babayev türk yazıçılarının əsərlərini rus dilinə tərcümə edib. Ömrünün son illərində Moskvada Əkbər Babayevin 8 kitabı çap olunub. Bunların arasında Nazim Hikmətin yaradıcılıq yolunu işıqlandıran monoqrafiya var. Həmin əsər Türkiyədə, Polşada, Rumıniyada, Yuqoslaviyada, İraqda da nəşr olunub.
1970-ci illərdə Türkiyə Yazarlar Birliyinin sədri Əziz Nesin və Fazil Hüsnü Babayevə ölkəyə gəlmək üçün dəvət göndərirlər. Lakin ona Türkiyəyə getməyə icazə verilmir.
Əkbər Babayev ağır xəstəlikdən sonra - 12 sentyabr 1979-cu ildə Moskva şəhərində vəfat edib.
Mənbələr:
