Gəncənin Gerbinə ucaldılmış abidə Gəncə şəhərində, Heydər Əliyev prospektində meydan ərazisində yerləşir. Abidənin açılışı 31 oktyabr 2006-cı ildə - Prezident İlham Əliyevin Gəncə səfəri zamanı baş tutub.
Abidə qədim Gəncə xanlığının gerbinin bərpa olunması şərəfinə ucaldılmışdır. Onun özülündə qızılı hərflərlə yazılmışdır: “Əsrlər boyu Gəncə xanlığının bayrağında həkk olunmuş bu rəmz 1804-cü ilin yanvarında şəhərin işğalı zamanı ləğv edilmişdir. 2004-cü ildə Azərbaycan Respublikasının Prezidenti İlham Əliyevin təşəbbüsü ilə Gəncənin qədim rəmzi yenidən gerb olaraq bərpa olunmuşdur” sözləri yazılmışdır.
Abidənin zirvəsində səthi qızıl təbəqə ilə örtülmüş Azərbaycanın Dövlət Gerbi, özülündə isə qədim dövlətçilik rəmzi kimi Gəncə şəhərinin Gerbi öz əksini tapıb. Gerbin sağ və sol tərəflərində bürüncdən iki şir heykəli yerləşir. Şir simvolu qədimdən ilahi hakimiyyəti, gücü, himayədarlığı və müdafiəni mənalandırır.
Gəncə xanlığının son hökmdarı Cavad xan Ziyadoğlunun hakimiyyəti dövründə (1786–1804) olan bayrağın simvolları xanın mənsub olduğu Ziyadoğlular nəslinin qədim dövrdən simvolları idi. Cavad xanın 1804-cü ildə rusların Gəncə xanlığını işğal etməsindən sonra öldürülməsi Ziyadoğlu sülaləsinin hakimiyyətinə son qoymuşdur. Onların rəsmi simvolları isə sıradan çıxarılmışdır.
Mənbələr:
