Rövşən Behcət 17 mart 1945-ci ildə Təbrizdə anadan olub. Onun atası 1938-ci ilə qədər Gəncədə yaşayıb, lakin repressiya illərində Təbrizə köçmək məcburiyyətində qalıb. 1961-ci ildə ailə gizli yolla yenidən Arazı keçib, Gəncəyə qayıdıb.
Rövşən Gəncədə təhsilini gecə məktəbində alıb. O, ailəsinə kömək etmək məqsədilə Alüminium Zavodunda işləyib. Behcət zavodun bədii özfəaliyyət kollektivinə üzv olub. Bir gün gənclərin yığışdığı məclisdə o zamanın məşhur mahnılarından olan “Ya Mustafa”nı oxuyur. İfası hamı tərəfindən bəyənilir və o, bundan sonra bütün tədbirlərə dəvət edilir.
Rövşən bir qədər sonra respublika üzrə özfəaliyyət baxışında iştirak edir. Azərbaycan dilində mahnı bilməməsi və ifa tərzinin fars boğazlarına aid olması ona maneə yaradır, lakin artıq tanınan ifaçı Gəncə mədəniyyət evinə dəvət olunur, toylara, şənliklərə, festivallara çağırılır. 1967-ci ildə keçirilən festivalda “Dəşti” təsnifinin ifasına görə qızıl medal qazanır, 1968-ci ildə isə Ümumdünya Gənclər Festivalının onluğuna düşür.
1993-cü ildə muğənni iflic olub və “Göygöl” ansamblında fəaliyyətini dayandırıb. Sənətkar iki il sonra yenidən “Göygöl”ə dəvət edilib, lakin 2000-ci ildə ansamblı tərk edib. Behcət uzunmüddətli fasilədən sonra Azərbaycan Dövlət Neft Şirkətinin nəzdində yaradılan “Neftçi” ansamblına işə düzəlib, lakin bu ansamblın da ömrü uzun olmur.
2007-ci ildə R. Behcətin həyat və yaradıcılığından bəhs edən “Yorulmamışam” filmi çəkilib.
Rövşən Behcət 19 avqust 2011-ci ildə Bakıda vəfat edib və uzun illər yaşadığı və yaratdığı Gəncədə, İmamzadə qəbiristanlığında dəfn edilib.
Mənbələr:
