XX əsrin ortalarında Gəncədə yeni sənaye müəssisələrinin və əhalinin sayının artması ilə daha geniş ərazini əhatə edən nəqliyyat növünə ehtiyac var idi. O zamanlar Gəncədə konkanı sıradan çıxarmış tramvaylar işləyirdi. 1 may 1955-ci ildə açılmış yeni nəqliyyat növü - trolleybus tramvayın qəniminə çevrildi. Bu rəqabət 1976-cı ildə tramvayın ləğv edilməsi ilə nəticələndi.
1980-ci illərin ortalarında Gəncədə trolleybuslar artıq 8 marşrut xətti üzrə hərəkət edirdi. Xətlərin ümumi uzunluğu isə 112.9 kilometrə çatdırılmışdı. Şəhərdə sovet modeli olan “MTB-82”, “ZİU-5” və “ZİU-9” trolleybusları ilə yanaşı, Çexoslovakiyanın (Çexiya və Slovakiya) “Scoda-9” və “Scoda-14” trolleybusları da işləyirdi.
Bütün SSRİ-də olduğu kimi, Gəncə şəhərində də trolleybusa 1990-cı illərdə tələbat azaldı. Baxımsızlıq və yeni texnikanın alınmaması səbəbindən trolleybuslar köhnəlib yararsız hala düşdü. Şəhər rəhbərliyi də marşrut taksilərin sayını artırmaq üçün trolleybus xətlərinin sayını azaltdı.
XXI əsrdə isə trolleybuslar çətin şəraitdə işləməyə məcbur oldular: sürücülər tez-tez elektrik kəsintisi və kontakt xəttindəki mis naqillərin oğurlanması ilə üzləşirdilər. Trolleybusların sonuncu xətti dəmir yol vağzalı ilə şəhərin bəzi məhəllələrini əlaqələndirirdi və burada cəmi 10 maşın işləyirdi.
2004-cü ildə Gəncədə trolleybuslar tamamilə ləğv edildi. İlin axırında sonuncu kontakt xətti də söküldü. Trolleybuslar isə bir müddət sonra metaləritmə müəssisələrinə göndərildi.
Mənbələr:
