12 oktyabr 1989-cu il saat 19:39 radələrində Gəncə aviabazasında (indiki Gəncə Beynəlxalq Hava Limanı) iki hərbi təyyarənin toqquşması nəticəsində qəza baş verib. Qəza nəticəsində 7 nəfər həlak olub.
Gencexeber.az məlumat verir ki, “Su-24” qırıcısının ekipajı gecə saatlarında səhvən uçuş-enmə zolağından keçib, digər tərəfdən uçuş zolağına çıxıb. 500 metr məsafə getdikdən sonra “Su-24” təyyarəsinin qanadı boş bir avtobusa çırpılıb. “Su-24”ün naviqatoru katapult edib və bunun nəticəsində sağ qalıb. Bundan dərhal sonra isə qırıcı həmin vaxt yanacaq dolduran “An-12” hərbi nəqliyyat təyyarəsinə çırpılıb. Nəticədə hər iki təyyarə alışıb.
“An-12”nin üç üzvü göyərtədən kənarda olduqlarına görə xəsarət almamışdılar. Lakin qəza nəticəsində nəqliyyat vasitəsinin 4 üzvü, həmçinin “Su-24” qırıcısının pilotu, aerodromun quru heyətinin iki hərbi əməkdaşı – tanker sürücüsü və yanacaq-sürtkü xidməti işçisi həlak olublar.
Gəncə aviabazası indiki Abbas Səhhət küçəsində yerləşib. Bu aviabaza keçmiş SSRİ Hərbi Hava Qüvvələrinin hərbi aerodromu idi. 1991-ci ildə SSRİ-nin dağılmasından sonra Gəncə aerodromundan hərbi məqsədlər üçün istifadə edilmədi. Daha sonra isə burada Gəncə Hava Limanı fəaliyyət göstərməyə başlayıb.
