Gəncə Dəmiryol Stansiyası 1882-1883-cü illərdə Tiflis və Bakı şəhərlərini birləşdirən dəmiryol xəttinin üzərində inşa edilib.
Stansiya Gəncənin şimalında, şəhər mərkəzindən 5 km aralıda yerləşirdi. Tikili görünüşünə görə Bakıdakı “Tiflis vağzalı” binasını xatırladırdı.
Bu stansiyaya gətirilən və oradan kəndlərə göndərilən yüklərin həcmi ildən-ilə artırdı. Həmçinin müxtəlif yerlərdən neft, kənd təsərrüfatı məhsulları, pambıq, ipək, xalça, mal-qara gətirilirdi.
Stansiyanın şəhərdən aralıda yerləşməsi şəhər əhalisinin və yerli sahibkarların narazılığına səbəb olub. Onlar stansiyanın yaxınlıqda tikilməsini xahiş etsələr də, bu, Dəmir Yolları Nazirliyi tərəfindən qəbul edilməyib. Belə dəyişiklik dəmir yolunun uzanacağına və malların daşınmasının bahalaşmasına səbəb ola bilərdi.
Stansiyada gediş-gəlişin çox olması ilə əlaqədar ərazidə əhalisi 1000 nəfərdən artıq olacaq yaşayış massivi salınıb, məktəb, aptek və digər müəssisələr istifadəyə verilib.
10 oktyabr 1888-ci ildə Bakıdan Gürcüstana gedərkən çar III Aleksandr və onun həyat yoldaşı Mariya Fyodorovna 20 dəqiqəlik Yelizavetpol Stansiyasında dayanırlar. Onları Gəncə qubernatoru knyaz Nakaşidze, şəhər başçısı, xan qızı Natəvan və digər şəxslər qarşılayırlar. Səfərin sonunda çar ailəsi uşaqlarla foto çəkdirdikdən sonra qatara minib, yollarına davam edib.
Gəncə Dəmiryol Stansiyasının binası 1970-ci illərdə dağıdılıb və sovet dövründə inşa edilən başqa bina ilə əvəz edilib.
