Nizami Gəncəvi adına kinoteatr Gəncədə Cavad xan küçəsində yerləşir. Kinoteatr binası 1956-cı ildə inşa edilərək, istifadəyə verilib. Tikilinin memarları S.Əmirova və L.Qasımova olublar. Bu kinoteatr sovet dövründə Gəncənin ən böyük mədəniyyət ocaqlarından biri hesab edilirdi.
Kinoteatr iki mərtəbədən ibarətdir. Sovet dövründə buranın birinci mərtəbəsində kassa, konsert səhnəsi olan foye, oxu zalı, bufet, inzibati və digər xidmət otaqları yerləşirdi. İkinci mərtəbədə isə hər biri 350 nəfər tutumu olan iki zal mövcud olub.
Zallardan biri geniş ekranlı filmlər üçün nəzərdə tutulmuşdur. Burada həmin dövrdə bədii və elmi-populyar filmlər nümayiş edilmişdir, həmçinin sovet və xarici kinematoqrafiyasının əldə etdiyi nailiyyətləri göstərən festivallar keçirilmişdir.
Sovet hakimiyyəti dövründə kinoteatrın foyesində gənc gəncəli rəssam və heykəltaraşların sərgiləri keçirilirdi. Həmçinin Nizami Gəncəvinin poeziya günlərində ona həsr olunmuş ədəbiyyat gecələri keçirilirdi. Burada Azərbaycan yazıçıları, şairləri, sənətşünasları və ədəbiyyatşünasları iştirak edirdi.
Kinoteatrın ətrafında yaşıl bağ salınmışdır. Mədəniyyət ocağının əsas girişinin önündə fontan da quraşdırılmışdır.
Nizami Gəncəvi adına kinoteatrda 1980-ci illərin sonuna kimi filmlər nümayiş olunub. 1990-cı ilin əvvəllərində isə kinoteatrın fəaliyyəti qismən məhdudlaşdırılıb, 2000-ci ildə isə tamamilə dayandırılıb.
Bura uzun müddət yararsız vəziyyətdə qalıb. Kinoteatrın binası 2020-ci ildə erməni terrorunun qurbanı olub. 2021-ci ildə orada əsaslı təmir-bərpa işləri görülüb.
Mənbələr:
[modula id="31817"]
