Bahadur Fərman oğlu Abdullayev 1939-cu ildə Daşkəsən rayonunun Muşavaq kəndində anadan olub. O, Bahadur Fərman kimi tanınıb.
Orta təhsilini başa vurduqdan sonra bir müddət kolxozda sürücü işləyib. 1969-cu ildə o, indiki Gəncə Dövlət Universitetinin Azərbaycan dili və ədəbiyyatı fakültəsini bitirib. Fərman sıravi müəllimlikdən Gəncə şəhər 12 və 25 nömrəli məktəblərinin direktoru, Gəncə şəhər Təhsil İdarəsinin baş inspektoru vəzifələrinə qədər yüksəlib.
Abdullayev hələ gənc yaşlarından bədii yaradıcılığa maraq göstərib, müxtəlif qəzet və jurnallarda, ədəbi almanaxlarda şeirlərini dərc etdirib. Sənətkarın “Anamın laylası” adlı ilk şeirlər kitabı 1966-cı ildə işıq üzü görüb. Müxtəlif illərdə Fərmanın “Durnalar köçür”, “Dörd cığır”, “Ömrün dolayları” “Əmanətdir ürəyim” şeir kitabları çap olunub. Müharibə mövzusunda şairin “Osvensim kədəri”, “Askol Murad”, “Şəkər nənə” kimi əsərləri var.
O, 1983-cü ildən Azərbaycan Yazıçılar Birliyinin üzvü olub. O, respublikadan kənarda keçirilən ədəbiyyat tədbirlərində Gəncəni təmsil edib. Onun şeirləri Rusiyada, Ukraynada, İranda, Türkiyədə və Gürcüstanda dərc olunub.
Təhsil sahəsindəki uzunmüddətli fəaliyyətinə görə Bahadur Fərman dəfələrlə müxtəlif mükafatlarla təltif olunub. O, 2015-ci ildə Prezident təqaüdünə layiq görülüb.
Bahadur Abdullayev 4 dekabr 2016-cı ildə vəfat edib və Gəncənin İmamzadə qəbiristanlığında dəfn edilib.
Mənbələr:
