Sərkar və ya Sarvan bulağı Gəncədən təxminən 7-8 kilometr uzaqlıqda, Samux rayonunun Sərkar kəndində yerləşir. Buranın suyu Qərb bölgəsində məşhurdur.
Suyun tarixi İkinci Dünya müharibəsindən (1939-1945) sonrakı illərə təsadüf edir. 1946-cı ildə Samux rayonu ərazisində sovet geoloqları neft çıxarmaq ümidi ilə qazıntılara başlayıb. Lakin torpaq qatlarından neft deyil, su qaynayıb.
Həmin illərdən bu su ehsan kimi insanlara paylanılıb. 1998-ci ildə isə burada bulaq inşa edilib. Bulağın üzərində olan kitabədə belə qeyd var: “Sərkarlılara Şəmistan Süleyman oğlundan Azərbaycan Demokratrik Cümhuriyyətinin 80-ci ildonümü münasibəti ilə ehsan”.
Sarvan bulağının mineral tərkibli olan suyu 1400 m dərinlikdən çıxır. Bu su mədə, böyrək və digər xəstəliklərin müalicəsi üçün effektiv hesab edilir. Sarvan bulağının suyunun əhəmiyyətli xüsusiyyətlərindən biri soyuq olmamasıdır. Sakinlərin sözlərinə görə, ilin fəsli və ya havanın soyuqluğundan asılı olmayaraq, suyun temperaturu dəyişmir.
Uzun illərdir ki, Gəncə şəhəri və ətraf rayonların sakinləri bu sudan istifadə etmək üçün Sərkar kəndinə gəlirlər. Hal-hazırda gün ərzində bulaq suyundan minə yaxın sakin istifadə edir.
Mənbələr:
