Hər il sosial şəbəkələrdə bu şəkil paylaşılır və onun altında yazı dərc edilir: “Gəncə sakinləri şəhərə girmək istəyən sovet tanklarının qarşısını kəsərkən, 22 yanvar 1990-cı il”. Lakin bu şəklin bir neçə gün əvvəl də, dəqiq desək, yanvarın 18-də çəkildiyini ehtimal etmək olar.
“Qara Yanvar. Sənədlər və materiallar” adlı kitabda 20 yanvar ərəfəsində baş vermiş hadisələr haqda qəzet materialları dərc olunub. Mənbədə Gəncə şəhərində SSRİ hakimiyyəti tərəfindən fövqəladə vəziyyətin elan edilməsi və buraya sovet qoşunlarının yollanması haqqında da məlumat var. Belə ki, sənədlərin birində “Вышка” (Vışka) qəzetinin 18 yanvar 1990-cı il tarixli buraxılışına istinad edilərək, növbəti sözlər yazılıb:
“Gəncə şəhərində vəziyyət ağır olaraq qalmaqda davam edir. Orada aerodrom və şəhərdən çıxış yolları bağlanıb. Ermənistanla sərhəddə yerləşən kəndlərin intensiv atəşə tutulması davam edir. Şəmxor rayonunda bir qrup şəxs Təzəkənd və Leninkənd (indiki Çinarlı) kəndlərinə hərəkət edən 5 zirehli transportyorun qarşısını almağa cəhd göstərib. Hərbçilər silahdan istifadə etməyə məcbur olublar. 2 nəfər yaralanıb”.
Eyni tarixli “Бакинский рабочий” qəzetinə istinad edən məlumatda isə bu sözlər əks olunub: “Gəncə şəhərinə gələn daxili qoşun hissələrinin blokadası aparılır. Halbuki bu bölmələr azərbaycanlı və erməni silahlıları arasında toqquşmaların baş verdiyi dağlıq Laçın rayonuna göndərilməli idi, Xanlara və ya Şaumyanovskiyə (indiki Goranboy) deyil. Beləliklə, iki qonşu respublikanın sərhəd kəndlərinin mühafizəsinin təşkili imkanları pozulur”.
Mənbə:
Черный январь: Документы и материалы. Баку - 1990.
