Məscid Gəncə şəhərinin Eminbəyli küçəsi, 60 ünvanında, Şərəfxanlı məhəlləsində yerləşir.
Bəzi mənbələrə əsasən, ibadət evi 1912-ci ildə Gəncədə yurd salmış Şərəfxanlı nəslindən olan Məşədi Molla İbrahim tərəfindən inşa edilib.
Başqa versiyaya görə, məscid daha qədim tarixə malikdir və onun inşası 1660-1670-ci illərə təsadüf edir. Rəvayətə görə, ibadətgah Mirzə Şəfi Vazehin atası, xanın baş memarı olan Kərbəlayi Sadıq tərəfindən təmir olunub. Deyilənlərə görə, bina vaxtilə məscid kimi istifadə olunsa da, mədrəsə kimi tikilib.
1918-ci ildən binada yeni tipli məktəb fəaliyyət göstərib. 1920-ci ildə məktəb yaxınlıqdakı binaya köçürülüb, buradan isə müəllimlər otağı kimi istifadə olunub. Sovet hakimiyyəti dövründə məscidin binasında M.F.Axundov adına 7 №-li natamam orta məktəb yerləşdirilib. Sonralar bu məktəb ictimai iaşə idarəsinin kulinariya məktəbi, sənət məktəbi, ticarət məktəbi kimi fəaliyyət göstərib.
Məscid Gəncəyə xas olan üslubda qızmızı kərpicdən inşa edilib və 4 otaqdan ibarət olub. Binanın çöl hissəsində məscid tikilən zaman çinar ağacları əkilib. 1920-ci il Gəncə üsyanında öldürülmüş beş nəfər Şərəfxanlı sakinini o zamanlar şəhər qəbiristanlığında dəfn etmək mümkün olmadığı üçün məscidin həyətində dəfn ediblər. 1924-cü ildə məscidin ətrafında hasar çəkilmişdir. İbadətgahın həyətində daha qədim dövrlərə aid bir abidə də mövcud olub.
2000-ci illərin əvvəllərində məscid təmir olunub, onun zahiri görünüşü dəyişdirilib.
Hazırda bina özəlləşdirilib və Nikah evi kimi istifadə edilir. Bina yerli əhəmiyyətli abidələr siyahısına daxildir.
Mənbələr:
