Miniatür Kitab Muzeyinin Gəncə filialı şəhərin Heydər Əliyev adına baş meydanında yerləşir. Muzeyin açılışı 2016-cı ilin may ayında baş tutub. Buranın təsisçisi ictimai xadim Zərifə Salahovadır.
Miniatür Kitab Muzeyinin Gəncə filialında dünyanın 25-dən çox ölkəsində çap edilmiş 1100-dən çox miniatür kitab nümayiş olunur. Vitrinlərdə rus, türk, ingilis, alman, ərəb, gürcü və başqa dillərdə çap olunan kitablar var.
Muzeydə Azərbaycan Respublikasında baş verən tarixi hadisələri əks etdirən, həmçinin klassik ədəbiyyat, elm və incəsənətə həsr olunmuş miniatür kitablar toplanıb. Filialda yalnız Azərbaycanın deyil, xarici ölkələrdən olan siyasətçilərə, ədəbiyyat, elm, incəsənət və idman xadimlərinə həsr edilmiş mini kitablar, dünya ədəbiyyatı nümunələri olan və rəngli illüstrasiyalı uşaq miniatür kitabları numayiş olunur.
Ekspozisiya zalında dini kitablar, o cümlədən ən qədim miniatür kitab - 1672-ci ildə Səudiyyə Ərəbistanında çap olunan Quran nümayiş etdirilir. Bu Quran, Ginnesin Rekordlar Kitabına daxil olub. Muzeydə ən kiçik miniatür kitab isə “Мой Баку” kitabıdır.
Muzeydə ümummilli lider Heydər Əliyevin həyat və fəaliyyətini əks etdirən, Prezident İlham Əliyevə və Birinci vitse-prezident Mehriban Əliyevaya həsr olunmuş miniatür kitablar da mövcuddur. Miniatür Kitab Muzeyinin Gəncə filialında Heydər Əliyevin “Azərbaycanda miniatür kitab nəşri sahəsində Zərifə xanım Salahovanın fəaliyyəti yüksək qiymətə layiqdir” sözləri yazılan guşə var. Bu guşədə, həmçinin Azərbaycan və xarici ölkələr, beynəlxalq qurumlar tərəfindən Zərifə Salahovaya təqdim olunan mükafat və təltiflər nümayiş olunur.
Miniatür Kitab Muzeyi 2002-ci ildə Bakıda fəaliyyətə başlayıb. Bakı və Gəncədən başqa, muzeyin filialları Naxçıvan və Şəkidə də var.
Mənbələr:
