Gəncə çöllərində yaz aylarında lalə gülü bitir. Bu gül haqqında bir çox əfsanə və rəvayətlər var. Lalə gülünün yaranması haqqında “Əsatirlər, əfsanə və rəvayətlər” kitabından sizə bir əfsanə təqdim edirik:
Deyilənə görə, Lalə adlı bir qız var imiş. Dərd, möhnət nə olduğunu bilməzmiş. O böyüyüb boya-başa çatır. Bundan sonra ona bir çox elçilər çıxır. Laləni sevdiyi bir oğlanla nişanlayırlar. Vaxt çatır, onlara toy edirlər.
Bir gün hökmdar şəhərin kişi əhalisini müharibəyə aparır. Ayrılarkən həyat yoldaşı Laləyə deyir: “İnşallah, baharda görüşərik”.
Lalə çox darıxır. O: “pis günün ömrü az olar”, - deyib, baharı gözləyir. Aylar ötür, qarlar əriyir, baharın nəfəsi duyulur. Lalə həyat yoldaşını yol kənarında, düzənliklərdə, dağda qarşılamaq üçün al qırmızı paltarını geyinib, onu gözləyir.
Lalə baharın ortalarına kimi dözür. Yoldaşından bir xəbər gəlmir. Lalə göz yaşları axıdır, dərd əlindən onun bağrı qaralır. Ərinin gəlmədiyini görən Lalə ölüm diləyir. Lakin o, qıpqırmızı paltarında gülə dönür. O, çox təmiz, pak qız olduğuna görə qırmızı paltarın içərisindən bağrının qaraldığı bilinir.
O vaxtdan bağrı qara Lalə hər il yaz çağında yol kənarına, düzənliklərə, dağlara çıxaraq, hələ də sevgilisinin yolunu gözləyir.
