Erməni mənbələrə əsasən, Gəncənin erməni məhəllələrindən biri Koryunapat olub. Onlara görə, 1905-1906-cı illərdəki erməni-müsəlman qırğınlarından sonra “torpaq sahiblərinin qarətindən qaçan” ermənilər 1907-ci ildə Koryunapat adlı yeni məhəllə yaratmaq qərarına gəldilər. Bu yeni məhəllə həmin vaxt Yelizavetpolun arximandriti (yaşına və təcrübəsinə görə hörmət edilən kilsə üzvü) olmuş erməni keşiş Saopnyans Koryunun adını almışdır.
Lakin çar dövrünə aid mənbə və sənədlər bunun növbəti erməni uydurması olduğunu sübut edir.
Bu ərazi Gəncənin tarixi Molla Cəlilli kəndi olub. Məhəllə XIX əsrə aid çar Rusiyasının mənbələrində, eyni zamanda Kilisəkənd kimi də qeydiyyata alınıb. Tarixi Molla Cəlilli böyük ərazini - indiki A. İsgəndərov, N. Nərimanov, Krılov, H.Z. Tağıyev küçələrini əhatə edib. Məhəllənin bir hissəsini azərbaycanlılar, digər hissəsini isə 1804-cü ildə Gəncənin işğal edilməsindən sonra İran və Türkiyədən köçürülmüş ermənilər təşkil edirdi.
1905-ci il erməni-müsəlman qırğını nəticəsində bu məhəllə çar hakimiyyətinin köməyi ilə ermənilər tərəfindən zəbt olundu. Burada müsəlmanlara aid evlər ermənilər tərəfindən yandırıldı və talan edildi. Sağ qalmış azərbaycanlılar Gəncə çayının sol sahilinə keçərək burada eyni adlı məhəllə salırlar. Zəbt olunmuş Molla Cəlillinin adı isə “Koryunapat”a dəyişdirilir.
Sonralar keşiş Koryunun terrorçu Daşnaksutyun partiyasının Yelizavetpol bölməsinin sədri olduğu üzə çıxır. O, törətdiyi çoxsaylı cinayətlərə görə, 9 noyabr 1908-ci ildə məhkəmə qərarı ilə katorqaya göndərilir. Koryunapatın adı dəyişdirilir, lakin Molla Cəlilli yox, Tserkovnıy qoyulur.
Mənbələr:
