Tofiq Məsim oğlu Bağırov 25 fevral 1926-cı ildə Göygölün Topalhəsənli kəndində anadan olub.
Gəncədə orta məktəbi bitirdikdən sonra o, 1943-cü ildə Tiflis Dəmiryol Nəqliyyatı Mühəndisləri İnstitutuna daxil olmuş, 1948-ci ildə institutu bitirərək Mahaçqalaya işləməyə göndərilmişdir. Sonralar Bağırov 1952-ci ildə Moskva Dəmiryol Akademiyasında Ali Mühəndislər kursunu bitirib, Biləcəri qovşağının rəisi təyin edilib.
Sonralar Bağırov Dəmir Yolları Bakı hissəsinin rəisi, Azərbaycan Dəmir Yolları İdarəsinin I-ci müavini vəzifələrində çalışır. 1961-ci ildə onu Avtomobil Təsərrüfatı naziri təyin edirlər. O, 1962-ci ildə Gəncə şəhər Partiya Komitəsinin I-ci katibi vəzifəsinə təyin edilir.
Tofiq Bağırov Kirovabad adını rəsmi yerlərdə işlətsə də, Gəncə adını bərpa etməyə cəhdlər göstərir. Şəhərin müxtəlif yerlərində "Gəncə" adını mehmanxana, univermaq, küçəyə verdirir, tanıdığı şair və yazıçılardan "Gəncə" adı ilə şeirlər, məqalələr yazmağı xahiş edir. Cavad xanın yeganə əksi onun səyi ilə xalça üzərinə köçürülərək Azərbaycana gətirilir.
Bağırov 1965-ci ildə Azərbaycan KP MK-nın Rəyasət heyətinə göndərdiyi məktubunda Kirovabad şəhərinin Gəncə adlandırılması məsələsini qaldırıb. Azərbaycanın Rusiyaya birləşdirilməsinin 150 illiyi ölkədə qeyd ediləndə Azərbaycana qonaq gələn SSRİ Ali Sovetinin sədri Podqornının rəsmi səfər proqramında Gəncəyə səyahəti də nəzərdə tutulmuşdu. Tofiq Bağırov Podqornı ilə söhbətdə "Kirovabad" adının, "Gəncə" adı ilə əvəzlənməsi barədə söhbət salır, dəlil və sübutlarla onu buna inandırır. Podqornı isə deyir: "Bu, sizin özünüzdən asılıdır. Biz etiraz etmərik". Lakin o dövrdə Bağırovu müdafiə edənlər olmadı.
Bağırovun dövründə Gəncənin baş planı hazırlanmış, yeni küçələr, parklar salınmışdı. 1991-ci ildə ona Gəncənin Fəxri Vətəndaşı adı verilmişdir.
Bağırov, həmçinin Azərbaycan KP Mərkəzi Komitəsində Təşkilat və Partiya orqanları şöbəsinin müdiri (1966–1971), Azərbaycan Dəmir Yolu İdarəsinin birinci rəis müavini (1971–1983) vəzifələrində çalışıb, Azərbaycan SSR Ali Sovetinə, bir dəfə isə SSRİ Ali Sovetinə deputat seçilib. O, Müstəqillik Aktının müəlliflərindən biri olub. Komissiya sədri kimi onun təklifi ilə 18 oktyabr tarixi Azərbaycanda bayram kimi qeyd olunur.
Tofiq Bağırov 2003-cü ildə vəfat edib.
Mənbələr:
