Bu gün Azərbaycan kinosunun 125 yaşı tamam olur. Bu münasibətlə sizə Gəncənin qəhrəman xanı Cavad xan haqqında çəkilmiş filmə aid məlumatı təqdim edirik:
“Cavad xan” filmi Xalq şairi Sabir Rüstəmxanlının “Ölüm zirvəsi” romanının motivləri əsasında, mərhum rejissor Rövşən Almuradlı tərəfindən çəkilib. Filmin məzmunu XIX əsrin əvvəllərində öz oğulları ilə birlikdə Vətən uğrunda Sisianovun başçılığı altında rus qoşunlarına qarşı mübarizə aparan və mərdliklə həlak olan sərkərdə, sonuncu Gəncə xanı Cavad xan barəsindədir.
Çəkilişlər Gəncədə, həmçinin Şəki və Zaqatala rayonlarında baş tutub. Cavad xanın divanxanası, kitabxana, Alban kilsəsinin daxili çəkilişləri pavilyonda, gürcü çariçanın ziyafət səhnəsi Bakı Mahnı Teatrında çəkilib. Kitabxananın yanma səhnəsində Azərbaycan kinosu tarixində ilk dəfə kompüter qrafikasından istifadə olunub.
Film o dövr üçün Azərbaycanda ən bahalı ekran əsəri hesab edilirdi. Filmdəki paltar və qiyafətlər Sankt-Peterburq şəhərindən sifariş edilib gətirilmişdir. Mədəniyyət Nazirliyinin sifarişi ilə ərsəyə gələn film üçün əvvəlcə 800 min manat vəsait ayrılsa da, bu yetərli olmayıb, yazıçı Sabir Rüstəmxanlının müraciətindən sonra əlavə vəsait də ayrılıb.
Filmin premyerası 2009-cu il 31 iyulda Bakıda, Heydər Əliyev Sarayında keçirilib, 17 sentyabrda isə Gəncədə, İcra Hakimiyyəti binasında nümayiş etdirilib. Filmin nümayişi, həmçinin Türkiyə, ABŞ, Polşa, Macarıstan kimi ölkələrdə keçirilib. 2010-cu ildə film Ukrayna dilində Ukrayna milli televiziyasının (UMT) birinci kanalında nümayiş etdirilmişdir. Rusiyada isə “Cavad xan” filminə qadağa qoyulub.
Filmdə 150-yə yaxın aktyor, o cümlədən xalq artistləri Nurəddin Mehdixanlı (Cavad xan), Ramiz Novruz (Sisianov), həmçinin Salam İsmayıl (Şeyx Yusif), Nuriyyə Hüseynova (Şükufə xanım), Rövşən Kərimduxt (Qasım bəy), İlqar Musayev (Uğurlu xan), Anar Fərəcbəyli (Hüseyn xan), Cavidan Novruz (Əliqulu xan) və başqa aktyorlar çəkiliblər. Filmin kütləvi səhnələrində daxili qoşunların əsgərləri də iştirak ediblər.
Mənbələr:
