Bəxtiyar Nadir oğlu Əliyev 1965-ci ildə Qərbi Azərbaycanın Zəngibasar rayonunda anadan olub. Bəxtiyar Gəncə şəhərinin ilk şəhidlərindən biridir.
O, 1968-ci ildə ailəsi ilə birlikdə Gəncəyə köçüb. Bəxtiyar Əliyev Gəncə şəhər 1saylı orta məktəbini bitirib. 1983-cü ildə o, həqiqi hərbi xidmətə çağırılıb. Bəxtiyar 2 il Kamçatkada xidmət etdikdən sonra Gəncəyə geri dönüb, buradakı Sement-beton zavodunda işləməyə başlayıb.
Bəxtiyar Əliyev 1988-ci ildə Milli Azadlıq Hərəkatına qoşulub. Bəxtiyar 100-dən çox erməni ailəsinin Gəncədən çıxarılmasında böyük fəallıq göstərib, onların şəhərdən ərzaq aparmalarına imkan verməyib. O, əksinə, erməni ailələrindən götürdüyü ərzaqlarla Hacıkənddə 44 azərbaycanlı ailəsinin tədarükünü təmin edib.
Yanvarın 12-də Çaykənd - Todan zonasında böyük gərginlik yaranır. Ermənistandan gələn vertolyotlar silah və təlim görmüş insanlar daşıyırdı. Onlar Çaykənd ərazisinin dinc əhalisini girov götürüb, hökumət adamlarını belə Göygöl zonasına buraxmırdılar. Buna dözməyən igidlər dəstələr yaradaraq, düşmənin üstünə gedirdilər.
13 yanvar 1990-cı ildə Bəxtiyar Əliyev döyüş yoldaşları Ruzigar Qasımov və Abbasqulu Məmmədovla birlikdə Çaykənddə ermənilərlə qarşılaşır. Nəticədə bir erməni zabiti Bəxtiyarı tutur və silahla Ruzigarı vurmağı əmr edir. Bəxtiyar isə bu təklifi rədd edərək, erməni zabitinin üzünə tüpürür. Həmin erməni isə tapança ilə Bəxtiyarın üzündən vurur. Beləliklə, Əliyev Bəxtiyar şəhidlik zirvəsinə ucalır.
Bu hadisənin şahidi olan ermənilər Bəxtiyarın vətənpərvər, qeyrətli, xalq naminə canını qurban verən oğul olduğunu söyləyirdilər.
Bəxtiyar Əliyev 14 yanvar 1990-cı ildə Gəncənin Şəhidlər xiyabanında dəfn olunub. Gəncədə şəhidin adını daşıyan küçə mövcuddur.
Mənbələr:
