Məmməd Rza oğlu Xəlilov 9 sentyabr 1917-ci ildə Gəncə şəhərində sənətkar ailəsində anadan olub.
O, 1935-ci ildə Azərbaycan Kənd Təsərrüfatı İnstitutuna daxil olur. Dördüncü kursda o, Ukraynanın Melitopol Kənd Təsərrüfatı İnstitutuna köçürülür, 1940-cı ildə oranın mühəndis-mexanizator fakültəsini bitirir. Sonra Xəlilov Azərbaycan SSR Xalq Əkinçilik Komissarlığına işləməyə göndərilir.
Xəlilov 1941-ci ildən sovet ordusu sıralarında Böyük Vətən müharibəsində iştirak etmişdir. Göstərdiyi qəhrəmanlığa görə o, “Döyüş xidmətlərinə görə” və “İgidliyə görə” medalları ilə təltif olunub.
1946-ci ildən Xəlilov Azərbaycan SSR Torpaqşünaslıq Nazirliyində mühəndis, baş mühəndis vəzifələrində işləmişdir. 1950-ci ildən o, Azərbaycan SSR Kənd Təsərrüfatı Nazirliyinin maşın-traktor idarəsinin şöbə müdiri, 1952-ci ildən Gəncə vilayətinin pambıqçılıq idarəsinin baş mühəndisi və digər vəzifələri icra edib.
Xəlilov 1960-cı ildən Azərbaycan SSR kənd təsərrüfatı nazirinin birinci müavini vəzifəsində çalışıb. O, 1961-1965-ci illərdə Azərbaycan SSR Kənd Təsərrüfatı Texnikası Birliyinin sədri, 1965-ci ildən ömrünün sonuna kimi Azərbaycan SSR kənd təsərrüfatı naziri olmuşdur.
Məmməd Xəlilov 3 dəfə “Qırmızı əmək bayrağı” ordeni ilə təltif olunub. O, dəfələrlə Azərbaycan KP MK üzvü, 4 çağırış Azərbaycan SSR Ali Sovetinin deputatı seçilmişdir. Xəlilov kənd təsərrüfatının inkişafına aid bir sıra kitabların müəllifi olub.
Məmməd Xəlilov 9 oktyabr 1976-cı ildə Bakıda vəfat edib və I Fəxri xiyabanda dəfn edilib.
Mənbələr:
