Zülfüqar Mehdi oğlu Məmmədov 21 mart 1903-cü ildə Gəncədə anadan olub.
O, ilk dəfə olaraq Azərbaycan Respublikası ərazisində endemik ur (zob) xəstəliyinin epidemiologiyası, diaqnostikası, profilaktika və müalicəsi üsullarını müəyyən edib.
Məmmədov 1921-ci ildə Gəncə gimnaziyasını bitirib. Daha sonra o, Azərbaycan Dövlət Universitetinin Tibb fakültəsinə (hal-hazırda Azərbaycan Tibb Universiteti) daxil olub.
O, 1926-1936-cı illərdə Azərbaycan Dövlət Universitetinin Tibb fakültəsinin Ümumi cərrahlıq kafedrasında müxtəlif vəzifələrdə çalışıb. Məmmədov 1936-cı ildə professor elmi adına layiq görülüb.
Zülfüqar Məmmədov cərrahiyyə sahəsi üzrə tanınmış alim idi. Onun elmi fəaliyyətinin əsas hissəsini endemik ur xəstəliyinin, endokrinoloji və digər xəstəliklərin, o cümlədən yanıqların, donmaların Naftalan neftindən hazırlanmış preparatlarla müalicəsi üsullarının işlənib hazırlanması təşkil edib.
Professor 1938-1971-ci illərdə Azərbaycan Dövlət Tibb İnstitutunun Ümumi cərrahlıq kafedrasının müdiri vəzifəsində çalışıb. O, respublikada zob xəstəliyi ilə mübarizə komitəsinin sədri, Azərbaycan Dövlət Həkimləri Təkmilləşdirmə İnstitutunun direktoru olub. Məmmədov 1943-1946-cı illərdə Azərbaycan Dövlət Tibb İnstitutunun rektoru vəzifəsində işləyib. Alim 1961-ci ildən Elmi Tədqiqat Kliniki və Eksperimental Təbabət İnstitutunun Endokrin cərrahlığı şöbəsinə rəhbərlik edib.
Zülfüqar Məmmədov 1947-ci ildən Azərbaycan Cərrahlar Cəmiyyətinin sədri və Ümumittifaq Endokrinoloqlar Komitəsinin üzvü olub. O, 1961-ci ildə Azərbaycan SSR Elmlər Akademiyasının müxbir üzvü, 1968-ci ildə həqiqi üzvü seçilib. Məmmədov 1962-ci ildən ömrünün sonuna qədər Ümumittifaq Cərrahlar Cəmiyyəti Rəyasət Heyətinin üzvü idi.
Alim 130-a qədər elmi əsərin, 8 monoqrafiyanın, “Ümumi cərrahlıq” dərsliyinin müəllifi olub.
Akademik Məmmədov 1942-ci ildə Əməkdar elm xadimi fəxri adına layiq görülüb, “Lenin”, “Qırmızı Ulduz”, “Qırmızı Əmək Bayrağı” ordenləri və medallarla təltif olunub.
Zülfüqar Məmmədov 5 iyul 1971-ci ildə Bakıda vəfat edib və vəsiyyətinə uyğun olaraq, Gəncədə dəfn edilib. Gəncədə onun adını daşıyan xəstəxana var.
Mənbələr:
