1992-ci il fevralın 25-dən 26-na keçən gecə SSRİ-nin Xankəndi şəhərində yerləşdirilmiş 366-cı motoatıcı alayın heyəti və zirehli texnikasının köməkliyi ilə erməni silahlı birləşmələri Xocalı şəhərinə hücum etmişdir. Onların törətdiyi soyqırım 1988-ci ildən başlamış Ermənistan - Azərbaycan münaqişəsinin ən qanlı faciəsi olmuşdur.
Xocalı faciəsi nəticəsində 613 nəfər qətlə yetirilib. Həlak olanların sırasında 63-ü uşaq, 106-sı qadın, 70-i qoca olub. 25 uşaq hər iki valideynini, 130 uşaq isə valideynlərindən birini itirmişdir. Yaralıların sayı 487 nəfər, əsir götürülənlərin sayı isə 1275 nəfər idi. 8 azərbaycanlı ailəsi tamamilə məhv edilmişdir. 150 nəfərin taleyi barədə bu günədək heç bir məlumat yoxdur. Həmin gün Xocalı yerlə-yeksan edilib və ermənilər tərəfindən işğal olunub.
Xocalı 19 sentyabr 2023-cü ildə aparılan lokal xarakterli antiterror əməliyyatları nəticəsində azad olunub. 15 oktyabrda Azərbaycan Respublikasının Prezidenti İlham Əliyev Xocalı şəhərində Azərbaycan Respublikasının Dövlət Bayrağını ucaldıb.
