İç qalanın əsas 6 bürcündən biri “Hacı xan” bürcü yaxud “Hacı qala” olub. Bu bürc Gəncə qalasının şimal hissəsində olan indiki Hacı Əli Hüseynzadə küçəsindəki Baş Polis İdarəsinin yaxınlığında yerləşib. Bürc yeddibucaqlı formada inşa edilmişdir. Ehtimal edilir ki, bürcün belə adlandırılması I Şah Abbas dövründə Gəncə bəylərbəyi olmuş Hacı xanın adı ilə əlaqədardır.
1804-cü ildə Gəncə qalasına rusların hücumu zamanı Cavad xan “Hacı xan” bürcündə şəhəri son nəfəsinə kimi müdafiə edirdi. Vəziyyətin ümidsizliyini görən xan topun üzərinə qalxaraq əlində qılıncla rusların hücumunu dəf edirdi. Burada o, düşmən tərəfindən vurulur, daha sonra isə onun cəsədi 17-ci yeger alayının kapitanı Kalovski tərəfindən qılıncdan keçirilir. Yalnız bundan sonra ruslar şəhərə daxil olub, onu işğal edə bilirlər.
Ruslar şəhəri işğal edəndən sonra İç qalanın daxilində olan tikililər yavaş-yavaş sökülməyə başlayıb. 1870-ci illərdə isə “Avropa-tipli müasir kvartallar”ın salınması bəhanəsi ilə “Hacı xan” bürcü və digər tarixi tikililər tam olaraq yerləyeksan edilib.
Mənbələr:
