Novruz çərşənbələrinin sonuncusu olan Torpaq çərşənbəsi, həmçinin “Yer çərşənbəsi” və “İlaxır çərşənbə” kimi tanınır. Çərşənbələrin içində ən möhtəşəmi, böyük təmtəraqla keçiriləni axır çərşənbə axşamıdır. Sonuncu çərşənbə axşamı ilə bağlı müxtəlif inanclar mövcuddur:
- Çərşənbə axşamı ailədə könül açan sözlər danışıb, dava-dalaş etməzlər ki, qulaq falına çıxan şəxs xoşagəlməz ifadələr eşidib evinə ümidsiz dönməsin.
- İlaxır çərşənbədə subay qızlar fala baxır və inanırlar ki, bu gündə edilən fal gələcək haqda daha dəqiq məlumat verir.
- Qədim el adət və inanclarına görə, ilaxır çərşənbədə uşağa beşik düzəldərlər.
- Bu gündə ailə üzvlərinin sayına görə şam yandırar, onu yarımçıq söndürməzlər.
- İlaxır çərşənbədə həyətdə qalanan tonqalın üstündən atılıb ağrı-acılarının odda yanmağını arzu edirlər. Burada məqsəd qışdan qalan dərdin, ağrı-acının adamın canından tökülməsi, insanın sağlam ruhla, saf qəlblə bayrama qovuşmaq istəyidir.
- Sonuncu çərşənbədə səməni halvası hazırlanır, 7 növ xörək və ya şirniyyat bişirilir. Bayram süfrəsində balığın olması bərəkət rəmzi hesab edilir.
