Qurban Məmiş oğlu Abbasov 2 yanvar 1944-cü ildə Göyçə mahalının Qarabağlar kəndində anadan olub.
O, 1964-1968-ci illərdə indiki Azərbaycan Dövlət Mədəniyyət və İncəsənət Universitetinin dram və kino aktyorluğu fakültəsində təhsil alıb. Abbasov 1968-ci ildə təyinatla Gəncə Dövlət Dram Teatrına göndərilib və onun yaradıcılığı 30 il ancaq bu kollektivlə bağlı olub.
Az müddətdə teatrın repertuar tamaşalarında əsas rollar ifa edən Abbasov “Anaların divanı” (Yusif İdris), “Vaqif” (Əli bəy), “Şərqin səhəri” (Cavanşir), “Unuda bilmirəm” (Kamran), “Bəxtsiz cavan” (Fərhad) və s. tamaşalarda obrazlar canlandırıb. Qurban Abbasov dramatik rollarda daha çox uğur qazanırdı. Onun lirik-psixoloji və romantik səciyyəli qəhrəman rolları da olmuşdur.
Abbasov 1981-ci ildə “Azərbaycan SSR Əməkdar artisti” fəxri adına layiq görülüb.
Qurban Abbasov 5 dekabr 1998-ci ildə Gəncə şəhərində vəfat edib və Səbiskar qəbiristanlığında dəfn olunub.
Mənbələr:
