Xalq artisti, rəqqasə Əminə Paşa qızı Dilbazinin vəfatından 15 il ötür.
Gencexeber.az xatırladır ki, Əminə Dilbazi 2010-cu il aprelin 30-da Bakıda vəfat edib.
O, 26 dekabr 1919-ci ildə Qazaxda anadan olub. Məşhur bəstəkar, Azərbaycan Xalq artisti Cövdət Hacıyevin həyat yoldaşı, bəstəkar-dirijor İsmayıl Hacıyevin anasıdır.
Xalq artisti 1935-ci ildə ilk dəfə səhnəyə çıxaraq Üzeyir Hacıbəyovun bəstələdiyi "Kolxoz çölləri" mahnısını ifa edib.
Azərbaycan Dövlət Filarmoniyası Mahnı və Dövlət Rəqs ansamblının solisti (1936-1939), sonralar isə rəqs qrupunun rəhbəri olub.
1959-cu ildə Azərbaycan Tibb İnstitutunun yaratdığı "Çinar" tələbə rəqs kollektivinə rəhbərlik edib. 1967-ci ildə "Sevinc" qızlar ansamblını yaradıb. 1949-cu ildən Xoreoqrafiya Məktəbində pedaqoji fəaliyyət göstərib. 1957-ci ildə Moskvada tələbə və gənclərin 6-cı Ümumdünya festivalında qızıl medala layiq görülüb.
Əminə Dilbazi bir çox filmlərdə rəqslərə quruluş verib. Onun oynadığı "İnnabı", "Tərəkəmə", "Vağzalı", "Turacı", "Naz eləmə" rəqsləri xüsusilə məşhurdur.
Repertuarına rus, Ukrayna, özbək və ərəb rəqsləri də daxil olan Əminə Dilbazi "Leyli və Məcnun" operasına, "Arşın mal alan", "O olmasın, bu olsun" komediyalarına və başqa əsərlərdə də rəqslərə quruluş verib.
Tanınmış rəqqasə 1954-cü ildə Əməkdar artist, 1959-cu ildə Xalq artisti adlarına layiq görülüb, 1999-cu ildə isə “İstiqlal” ordeni ilə təltif edilib.
