Avqustun 1-i Azərbaycan Əlifbası və Azərbaycan Dili Günü kimi qeyd edilir.
Gencexeber.az məlumat verir ki, həmin gün 1990-cı ildə Azərbaycan Əlifba Komissiyası yaradılıb. Komissiyanın tərtib etdiyi yeni əlifba müstəqillik dövründə – 1992-ci ildə təsdiq edilib. 2001-ci ilin 9 avqustunda Prezident Heydər Əliyev “Azərbaycan Əlifbası və Azərbaycan Dili Gününün təsis edilməsi haqqında” Fərman imzalayıb.
Azərbaycan dilinin dövlət dili kimi hüquqi aktlarda təsbit olunması məsələsi hələ XX əsrin əvvəllərində – Azərbaycan Xalq Cümhuriyyətinin hakimiyyəti dövründə böyük aktuallıq kəsb etmişdi. AXC-nin paytaxtı Gəncə olduğu dövrdə Parlamentin rəsmi dili Azərbaycan dili elan olunmuş, digər millətlərin nümayəndələrinin öz çıxışlarını rus dilində etmələri hələlik məqbul sayılmışdı. Bununla belə rəsmi sənədlərin hamısı ana dilində tərtib edilirdi. Azərbaycan türkcəsində olmayan sənədlərə baxılmırdı. Bu barədə Nazirlər Şurasının 1918-ci il 27 iyun tarixli xüsusi Fərmanı da mövcuddur.
Sovet dövründə 1930-cu illərdə ana dilində dərsliklər yazıldı, Azərbaycan folklorunun toplanması və nəşri sahəsində ciddi işlər görülməyə başlandı. Bu prosesdə gəncəli Həmid Araslı kimi folklorşünas alimlərin əməyi olmuşdur. Lakin Azərbaycan dilinin hüquqi statusu barədə qərar keçmiş sovet rəhbərliyinin apardığı totalitar siyasət nəticəsində qəbul edilmirdi. Əlifba sahəsində görülən işlər 1929-cu ildə latın qrafikasının tətbiqi ilə nəticələnsə də, 1940-cı ildə bu əlifba kiril qrafikası ilə əvəz edilib.
