140 il bundan əvvəl, 31 yanvar 1884-cü ildə Bakının Novxanı kəndində Azərbaycan Xalq Cümhuriyyətinin qurucularından olan Məhəmməd Əmin Rəsulzadə anadan olub. Rəsulzadə milli azadlıq hərəkatının digər nümayəndələri ilə birlikdə Azərbaycanın müstəqil dövlət olması uğrunda mübarizə aparıb. 1918-ci ildə, AXC-nin elan edilməsindən sonra Rəsulzadənin iştirakı ilə hökumət tərəfindən demokratik dövlət quruculuğu, iqtisadiyyat, mədəniyyət, təhsil, səhiyyə, hərbi quruculuq sahələrində mühüm addımlar atılıb.
AXC şurasının Gəncəyə köçməsindən bir gün sonra, 17 iyun 1918-ci ildə Rəsulzadə Gəncədə Azərbaycan Milli Şurasının iclasında bu sözləri səsləndirdi:
“Əfəndilər! Hələ səhər iclasını açanda indiki şəraitin necə əhəmiyyətli olduğunu xatırlamışdım. Qəbul etdiyiniz qərarların tarixi məsuliyyətinin dözülməz ağırlığını Fətəli Xan Xoyskinin yaratdığı hökumətin çiyninə atdınız. Dünya müharibəsindən və Rusiya inqilabından doğulub, siyasi həyata ilk addımını atan Azərbaycan idealı hazırda sözlə deyilə bilməyən gərgin illər keçirir. Bu yeni doğulmuş siyasi türk övladı böyüyüb yaşa dolacaqmı, başqa xalqlar arasında yer tutacaqmı? Yoxsa zəif uşaq kimi məhv olacaq? Əfəndilər, demək istəyirəm ki, Azərbaycan hətta Qafqazda ən azadlıqsevər və inqilabi respublika sayılan Gürcüstandan da xoşbəxt olacaq!..”
1920-ci ildə, AXC-nin süqutundan sonra Rəsulzadə xaricdə Azərbaycanın müstəqilliyinin bərpası uğrunda mübarizəni davam edib. Məhəmməd Əmin Rəsulzadə 6 mart 1955-ci ildə Ankarada vəfat edib. Bu gün Azərbaycan dövləti Xalq Cümhuriyyətinin varisi kimi onun demokratik ənənələrini davam etdirir.
