Bu gün Azərbaycanda Novruz bayramının ilk çərşənbəsi - Su çərşənbəsi qeyd edilir.
Gəncə əhalisinin Novruz bayramı ilə bağlı bir çox adət-ənənələri mövcuddur. Əvvəllər ilk çərşənbədə şəhər sakinləri səhər tezdən nəğmələr oxuya-oxuya evlərinə su gətirmək üçün gedərdilər. Hər məhəllənin öz bulağı, kəhrizi var idi. Gətirilən su evin dörd bir küncünə və evdə yaşayanların üzünə çilənərdi.
Gəncədə qədim inanclara görə, qızlar əllərinin baş barmaqlarını iplə bağlayıb arxın üstündən bir neçə dəfə tullanandan sonra ipi kəsib suya atsalar, bəxtləri açılardı. Su çərşənbəsində sulaşma oyunu keçirilərdi. Oğlan qıza su atardısa, onun gözaltısı sayılardı.
