Heydər Əlirza oğlu Əliyev 10 may 1923-cü ildə Naxçıvan şəhərində anadan olub. O, 1993 və 1998-ci illərdə Azərbaycanın Prezidenti seçilib. Heydər Əliyev 12 dekabr 2003-cü ildə xəstəlikdən ABŞ-də klinikada vəfat edib və 15 dekabrda Bakıdakı Fəxri xiyabanda dəfn olunub.
Heydər Əliyevin Gəncənin inkişafında böyük rolu olub. Ulu öndər 14 iyul 1969-cu ildə Azərbaycan Kommunist Partiyası Mərkəzi Komitəsinin birinci katibi olandan sonra onun təşəbbüsü ilə Gəncənin sosial-iqtisadi inkişafına başlanılıb.
1980-ci ilin iyul ayında Heydər Əliyev Gəncə Hava Limanının yeni uçuş xətlərinin açılışında iştirak edib. Bundan əlavə, Gəncədə çini qablar zavodunun, qənnadı fabrikinin, taxıl məhsulları, xalça, ət və süd kombinatlarının inşası da məhz Heydər Əliyevin adı ilə bağlıdır. Həmçinin Yeni Gəncə və Gülüstan yaşayış sahələri, avtomobilçilər qəsəbələrinin salınmasında ulu öndərin əməyi olub.
Heydər Əliyev 1993-cü ildə Azərbaycanın Prezidenti seçildikdən sonra ilk işgüzar səfərini Gəncəyə edib. Daha sonra ulu öndər buraya 7 oktyabr 1998-ci ildə səfər edib və Gəncə qarnizonunun əsgər və zabitləri ilə, şəhər və ətraf rayonların seçiciləri ilə görüş keçirib. Heydər Əliyevin Gəncəyə son səfəri 12-13 sentyabr 2002-ci ildə baş tutub. O, Gəncə Olimpiya İdman Kompleksinin açılışında iştirak edib.
