Azərbaycan Ordusunun 2020-ci ilin sentyabrında başladığı əks-hücum nəticəsində Zəngilan şəhəri oktyabrın 20-də erməni işğalından azad edilib. Həmin gün Prezident İlham Əliyev Zəngilan rayonunun Havalı, Zərnəli, Məmmədbəyli, Həkəri, Şərifan, Muğanlı kəndlərinin də işğaldan azad olunduğunu elan edib. Nəticədə Zəngilan 44 günlük Vətən müharibəsində işğaldan azad edilən üçüncü rayon olub.
Prezident İlham Əliyev həmin gün müraciətində, həmçinin Füzuli rayonunun Dördçinar, Kürdlər, Yuxarı Əbdürrəhmanlı, Qarğabazar, Aşağı Veysəlli, Yuxarı Aybasanlı, Cəbrayıl rayonunun Safarşa, Həsənqaydı, Fuğanlı, İmambağı, Daş Veysəlli, Ağtəpə, Yarəhmədli, Xocavənd rayonunun Ağcakənd, Mülküdərə, Daşbaşı, Günəşli, Çinarlı kəndlərinin işğaldan azad edildiyini bildirib.
Zəngilan rayonu 1993-cü il oktyabrın 29-da Ermənistan silahlı qüvvələri tərəfindən işğal edilmişdi. Rayonun 1 şəhər, 5 qəsəbə və 83 kəndi düşmən əlində olduğu dövrdə tamamilə dağıdılıb.
