Hikmət Fərhad oğlu Hacıyev 15 oktyabr 1979-cu ildə Gəncə şəhərində anadan olub.
O, Gəncədəki 24 saylı orta məktəbi bitirib, sonra Bakı Dövlət Universitetinin Beynəlxalq Münasibətlər və Beynəlxalq Hüquq fakültəsinin bakalavr və magistr pillələrində ali təhsil alıb. Hacıyev NATO-nun Müdafiə kolleci, Təhlükəsizlik məsələlərinin tədqiqi üzrə Corc Marşal Mərkəzi və Belçikanın ULB Universitetinin magistr pilləsinin məzunudur.
Hikmət Hacıyev 2000-ci ildən Azərbaycan Xarici İşlər Nazirliyi sistemində çalışır. Müxtəlif illərdə o, Azərbaycanın NATO nümayəndəliyində, Azərbaycanın Küveyt və Misirdəki səfirliklərində vəzifə alıb. 2014-2018-ci illərdə Hacıyev Azərbaycan Xarici İşlər Nazirliyinin (XİN) Mətbuat Xidmətinin rəhbəri vəzifəsində işləyib.
Hacıyev 2018-ci ildə Azərbaycan Respublikası Prezident Administrasiyasının xarici əlaqələr şöbəsinin rəhbərinin müavini vəzifəsini icra edib, həmin ilin noyabrında isə bu şöbənin rəhbəri vəzifəsinə təyin olunub. 2019-cu ildə o, Azərbaycan Respublikası Prezidentinin köməkçisi - Azərbaycan Respublikası Prezidentinin Administrasiyasının Xarici siyasət məsələləri şöbəsinin müdiri vəzifəsinə təyin edilib.
Hikmət Hacıyev “Diplomatik xidmətdə fərqlənməyə görə” medalı və 2-ci dərəcəli “Vətənə xidmətə görə” ordeni ilə təltif olunub.
Hikmət Hacıyev Vətən müharibəsi başlayan gündən diplomatik cəbhədə ona tapşırılan işin öhdəsindən ləyaqətlə gələrək, insanlar tərəfindən rəğbətlə qarşılanıb və o, Azərbaycan cəmiyyətində ən çox tanınan şəxsiyyətlərdən birinə çevrilib.
