Bu gün Azərbaycan Xalq Cümhuriyyətinin qurucularından olan Məhəmməd Əmin Rəsulzadənin anadan olmasının 139-cu ildönümüdür. Rəsulzadə 31 yanvar 1884-cü ildə Bakının Novxanı kəndində anadan olub. O, gənc yaşlarından inqilabi hərəkata qoşulub, Azərbaycanın Rusiyadan ayrılaraq müstəqil dövlət yaratması uğrunda mübarizə aparıb və 1918-ci ildə buna nail olub. 1920-ci ildə, AXC-nın süqutundan sonra Rəsulzadə xaricdə Azərbaycanın müstəqilliyinin bərpa olunması uğrunda mübarizəni davam edib. Məhəmməd Əmin Rəsulzadə 6 mart 1955-ci ildə Ankarada vəfat edib və Əsri qəbiristanlığında dəfn olunub.
Sizə görkəmli ictimai-siyasi xadimin məşhur fikirlərini təqdim edirik:
- Rəsulzadə, Təbriz və Tehranda fəaliyyəti dövründə (1909-1911) millət və milliyət anlayışlarına daha çox fikir verirdi. O, yazırdı: “Türk dili burada (İranda) beynəmiləl bir dildir. Onu hər kəs bilir. Erməni, kürd, rus, fransız, ingilis, fars, aysor, alman hamısı türkcə danışır. Türkəm bu cəhətdən özümü xoşbəxt hiss edirəm!”
- 1915–1918-ci illərdə nəşr olunmuş “Açıq söz” qəzetinin 413-cü nömrəli, 27 fevral tarixli sayında “İslam dini və ana dili” məqaləsində Rəsulzadə dualar, namaz ana dilində ola bilərmi sualına aydınlıq gətirilib: “Diləkləri öz dilində diləmək, istədiklərini öz dilində istəmək, ağzından çıxan sözlərin nə mənada sözlər olduğunun özünü də bilmək bizcə daha məqbul görünüyor. Duaların mənalarını anlamaqla xalqda islamın ruhunu, fikrini anlamaq daha da irəlilər.”
- Məhəmməd Əmin Rəsulzadə “Əsrimizin Səyavuşu” əsərinin sonunda “Bir kərə yüksələn bayraq bir daha enməz” sözləri yazmışdır. Onun bu ifadəsi XX əsrdə Azərbaycanda müstəqillik hərəkatının şüarı olmuşdur.
- “Sən bizimsən, bizimsən durduqca bədəndə Can, yaşa, yaşa, çox yaşa, ey şanlı Azərbaycan!” - bu fikirlər Məhəmməd Əmin Rəsulzadənin 28 May 1953-cü il “Amerikanın Səsi” radiosundan Azərbaycan xalqına xitabından götürülüb.
Mənbələr:
- Faiq Qəzənfər oğlu Ələkbərov. Məhəmməd Əmin Rəsulzadənin dünyagörüşü. Bakı-2007.
- Yaqublu N.Q. Məhəmməd Əmin Rəsulzadə Ensiklopediyası. Bakı-2013.
- https://kulis.az/xeber/tarix/xeber________________________________-5890
