Şərif Hacı oğlu Şərifov 12 iyun 1945-ci ildə Gəncədə anadan olub.
O, şəhər rəssamlıq məktəbini bitirdikdən sonra Ə.Əzimzadə adına Azərbaycan Rəssamlıq Məktəbinin heykəltaraşlıq fakültələsinə daxil olub. Daha sonra S.Q.Stroqanov adına Moskva Ali Rəssamlıq-Sənaye Məktəbinin memarlıq və dekorativ plastika fakültəsini bitirib. Moskvada təhsilini bitirdikdən sonra rəssam 1971-ci ildə Gəncəyə qayıdıb.
1972-ci ildən artıq SSRİ Rəssamlar İttifaqının üzvü olan Şərifovun ilk əsərlərindən biri “Kənd dülgəri” heykəli olub. O, 1978-ci ildə SSRİ Rəssamlıq Akademiyasının bir sıra diplom və mükafatlarına, 1980-ci ildə isə Respublika Komsomolu Mükafatına layiq görülür. Sonrakı illərdə Şərifov Gəncənin Baş rəssamı, Baş memarı vəzifələrini daşıyıb. O, həmçinin Gəncə Pedaqoji texnikumunda dərs deyib.
Azərbaycanın Əməkdar rəssamı, Prezident təqaüdçüsü Şərif Şərifov Gəncədə yüzlərlə abidə, kompleks, digər memarlıq və dekor nümunələrinin müəllifidir. Onların içərisində "Mir Cəlal Paşayev", "Mirzə Şəfi Vazeh və müasirləri" büstləri, "Leyli və Məcnun", "Xəmsə" qəhrəmanları", "Şir və Günəş", "Gəncə gerbi" və başqa abidələr var. Sənətkar Türkiyənin Gəncəyə qardaş olan Qars şəhərindəki Heydər Əliyev Parkının salınmasında iştirak edib. Burada onun yaratdığı "Leyli və Məcnun", "Həmyerlilər", "Dülgər" abidələrini 2002-ci ildə ulu öndər şəxsən açıb.
Şərifovun eskizləri əsasında bir sıra portret xalçaları hazırlanıb. ABŞ-nin sabiq prezidenti B. Klintonun qızının portret-xalçası Heydər Əliyev tərəfindən 2001-ci ildə Klintona hədiyyə edilib.
Şərifov 2012-ci ildən Rusiya Rəssamlıq Akademiyasının fəxri üzvüdür. Sənətkar Nəriman Nərimanovun və ulu öndər Heydər Əliyevin Gəncə şəhərində ucaldılmış abidələrinə görə isə 2017-ci ilin mayında bu akademiyanın Qızıl Medalına layiq görülüb.
Şərifovun əsərləri Rusiya, ABŞ, Türkiyə, Polşa və bir sıra digər ölkələrin muzeylərində və şəxsi kolleksiyalarda saxlanılır. Rusiya, Türkiyə, İsveçrə muzeylərində onun fərdi sərgiləri keçirilmişdir.
Mənbələr:
