Bu gün gəncəli alim Asəf Hacıyevin 72-ci doğum günüdür

Asəf Hacı oğlu Hacıyev 29 may 1951-ci ildə Gəncə şəhərində anadan olub.

O, 1973-cü ildə indiki M.V.Lomonosov adına Moskva Dövlət Universitetinin mexanika-riyaziyyat fakültəsini bitirib. Hacıyev əmək fəaliyyətinə 1979-cu ildə Azərbaycan Milli Elmlər Akademiyasının Kibernetika İnstitutunda başlayıb. O, 2001-ci ildən Bakı Dövlət Universitetinin Ehtimal nəzəriyyəsi və riyazi statistika kafedrasının müdiri kimi çalışıb.

Asəf Hacıyev 1992-ci ildə Almaniyadakı Münhen Universitetinin, 1992-1997-ci illərdə Türkiyədəki Boğaziçi Universitetinin (İstanbul), 1997-2015-ci illərdə Bakı Dövlət Universitetinin professoru, həmçinin müxtəlif illərdə ABŞ, İsveç və digər ölkələrin universitetlərinə dəvət olunaraq, professor vəzifələrində işləyib.

Hacıyev 1979-cu ildə riyaziyyat üzrə fəlsəfə doktoru, 1993-cü ildə riyaziyyat üzrə elmlər doktoru elmi dərəcələrini, 2003-cü ildə professor adını alıb. O, 2001-ci ildən AMEA-nın müxbir, 2014-cü ildən isə həqiqi üzvüdür.

Alim 1995-2015-ci illərdə Azərbaycan Respublikası Milli Məclisinin Birinci, İkinci, Üçüncü və Dördüncü çağırışları üzrə deputat seçilib, bundan əlavə, elm və təhsil komissiyasının üzvü olub. O, 2006-2008 və 2011-2013-cü illərdə Qara Dəniz İqtisadi Əməkdaşlıq Təşkilatı Parlament Assambleyasının vitse-prezidenti, 2015-ci ildən isə Baş katibidir.

Asəf Hacıyev 2004-cü ildə Beynəlxalq Statistika İnstitutunun, 2005-ci ildə Dünya Elmlər Akademiyasının və 2008-ci ildə Monqolus­tan Milli Elmlər Akademiyasının üzvü, 2011-ci ildə Çinin Çengdu Universiteti­nin və Gəncə Universitetinin fəxri professoru seçilib. O, 2005-2011-ci illərdə İtaliyanın Əbdüs Salam adına Fizika üzrə Beynəlxalq Mərkəzinin assosiativ üzvü olub.

Alim tətbiqi riyaziyyat, ehtimal nəzəriyyəsi, statistika, idarəetmə məsə­lələri, tətbiqi mexanika sahəsi üzrə mütəxəssisdir. O, Azərbaycan dilində ilk dəfə hazırlanmış “Ehtimal nəzəriyyəsi və riyazi statistika ensiklope­diyası”nın müəlliflərindən biridir. Asəf Hacıyev 150-dən çox elmi əsərin və 3 kitabın müəllifidir.

Asəf Hacıyev 1980-ci ildə Elm və Texnika sahəsindəki xidmətlərinə görə Azərbaycan Lenin Komsomolunun mükafatına layiq görülüb.

Mənbələr:

1. https://science.gov.az/az/forms/deystvitelnyie-chlenyi/1115


2. https://meclis.gov.az/news-dep.php?id=61&lang=en


3. https://azertag.az/xeber/Akademik_Asef_Haciyevin_biblioqrafik_gostericisi_nesr_olunub-2328473


4. https://www.nkpi.az/?page=addread&id=1003