Bu gün Azərbaycanda Novruz bayramının ilk çərşənbəsi - Su çərşənbəsi qeyd edilir. Su çərşənbəsinə, həmçinin “yalançı çərşənbə”, “əzəl çərşənbə”, “gül çərşənbə” də deyilir.
Gəncə əhalisinin Novruz bayramı ilə bağlı ənənələri mövcuddur. Əvvəllər bu gün şəhər sakinləri səhər tezdən nəğmələr oxuyaraq, evlərinə su gətirmək üçün gedərdilər. Hər məhəllənin öz bulağı, kəhrizi var idi. Gətirilən su, evin dörd bir küncünə və evdə yaşayanların üzünə çilənərdi.
Gəncədə qədim inanca görə, qızlar əllərinin baş barmaqlarını iplə bağlayıb arxın üstündən bir neçə dəfə tullanandan sonra ipi kəsib suya atsalar, bəxtləri açılardı. Su çərşənbəsində sulaşma oyunu keçirilərdi. Oğlan qıza su atardısa, onun gözaltısı sayılardı.
