Ramiz Abutalıb oğlu Abutalıbov 27 oktyabr 1937-ci ildə Gəncədə anadan olub.
O, 1960-cı ildə indiki Bakı Dövlət Universitetini bitirdikdən sonra təhsilini Moskvada davam etdirib, 1971-ci ildə Ümumittifaq Xarici Ticarət, 1984-cü ildə isə İctimai Elmlər Akademiyalarına qəbul olunub.
Abutalıbov 1980-1984-cü illərdə Azərbaycan Kommunist Partiyası Mərkəzi Komitəsi Xarici Əlaqələr Şöbəsinin müdiri, Azərbaycan SSR Ali Sovetinin Xarici işlər üzrə komissiyasının sədri vəzifələrində çalışıb. O, 1971-1979, eləcə də 1985-1991-ci illərdə SSRİ-nin UNESCO-dakı nümayəndəliyində çalışıb. 1990-cı ildə “Beynəlxalq münasibətlərdə kim kimdir” dünya ensiklopediyasında 269 sovet diplomatı siyahısına daxil edilmiş yeganə azərbaycanlı Ramiz Abutalıbovdur. 1992-2004-cü illərdə o, müstəqil Azərbaycanın UNESCO-da daimi nümayəndəsi olub.
Ramiz Abutalıbov Parisdə 1989-cu ildə “Azərbaycan Evi” Assosiasiyasının yaradıcılarından biri olub. Diplomat Əlimərdan bəy Topçubaşovun xatirə lövhəsinin, Fransanın azadlığı uğrunda həlak olmuş azərbaycanlılara Rodez şəhərində abidənin qoyulmasında, Fransada bir neçə mühacir həmvətənimizin qəbrinin bərpa edilməsində yaxından iştirak edib. O, Azərbaycan Xalq Cümhuriyyətinin süqutundan sonra mühacirətdə yaşamış ictimai-siyasi xadimlərimizin həyat və fəaliyyətlərinin araşdırılmasında xüsusi rol oynayıb. Abutalıbov bu insanlara aid nadir arxiv sənədləri, məktubları, məqalələri və rəsmləri toplayaraq, xaricdən Azərbaycana gətirib.
Abutalıbov “Parisdə illər və görüşlər”, “Özgələr arasında özününkü, özününkülər arasında özgə” , “Azərbaycan Demokratik Respublikası-90”, “Məhəmməd Əmin Rəsulzadə və Qafqaz konfederasiyası”, “Odlar yurdu Azərbaycanın siyasi mühacirətinin tarixi”, “1920-1945 illərdə”, “A.M. Topçubaşı. Paris arxivi” - 4 cilddə kitablarının müəllifidir. O, “Əbədi ezamiyyət” sənədli filminin ideya müəllifi və baş məsləhətçisidir.
Diplomat 1-ci dərəcəli müşavir adına, H.Z.Tağıyev adına Milli mükafata, Fransanın Fəxri Legion ordeninə və başqa mükafatlara layiq görülüb.
Ramiz Abutalıbov 1 yanvar 2022-ci ildə Moskva xəstəxanasında vəfat edib və Bakıda, İkinci Fəxri xiyabanda dəfn edilib.
Mənbələr:
