Aslan bəy Ağalar oğlu Səfikürdski 30 sentyabr 1881-ci ildə indiki Göygöl rayonunun Səfikürd kəndində doğulub. O, 28 may 1918-ci ildə Azərbaycan Xalq Cümhuriyyətinin İstiqlal Bəyannaməsinə imza atanlardan biri olub.
Səfikürdski orta təhsilini Gəncə klassik gimnaziyasında alıb. O, 1902-1907-ci illərdə Sankt-Peterburq universitetinin hüquq fakültəsində təhsil alıb. Səfikürdski ali təhsilini başa vurduqdan sonra Gəncəyə qayıdıb və burada bir müddət vəkil köməkçisi işləyib. O, 1913-cü ildə Dairə Məhkəməsində vəkil rütbəsi alıb və 1914-cü ilə qədər vəkil işləyib.
Səfikürdski 1916-cı ilə qədər Gəncə Dumasının üzvü olub.
Aslan bəy Səfikürdski AXC hakimiyyəti dövründə Parlamentə deputat seçilmişdi.
O, Fətəli xan Xoyskinin təşkil etdiyi 3-cü Hökumət kabinəsində Poçt, teleqraf və əmək naziri, 4-cü Hökumət kabinəsində isə Ədliyyə və əmək naziri təyin edilib. Aslan bəyin təşəbbüsü ilə Azərbaycanda ilk dəfə hüquq elmi üzrə kitabxana təşkil olunub.
1920-ci il sovet işğalından sonra Azərbaycan SSR Xalq Ədliyyə Komissarının müavini işləsə də, Səfikürdski bolşeviklər tərəfindən təqiblərə məruz qalıb. O, 1917-ci ilə qədər eserlər partiyasının üzvü olduğuna görə 1922-ci ildə sovet hökuməti tərəfindən istintaqa cəlb olunub və üç il müddətinə həbs edilib. Həbs müddəti bitdikdən sonra Səfikürdski bir müddət, “Azneft”in hüquq məsləhətçisi işləyib, lakin yenə də təqiblərə məruz
qalıb. Bu təqiblərə dözməyən Aslan bəy xəstə düşmüş və uzun müddət yataqda qalmışdı.
Aslan Səfikürdski 15 oktyabr 1937-ci ildə Bakıda vəfat edib. Onun məzarı hələ də tapılmayıb.
Mənbələr:
